ANGKA DONGAN SIMAGODANG
Panggurit: Panusunan Simanjuntak
Angka dongan simagodang
marpulu taon ma hita so hea pajumpang
sungkunsungkun do rohanghi
di dia do hamu nuaeng maringanan
marserak hita nahinan
ala laho be tu parjalangan
mangalului hapistaran
mangalului pandaraman
mangalului na ringkot di parngoluon
Huingot do na uju i
borhat hita tu dolok laho mangalap soban
dalan rahis na metmet i
mansai landit do i molo di ari udan
alai gompis do patta i
nangkok nang tuat di robean
dagingta maridihon hodok
hinorhon ni boban na dokdok
alai rohanta sai tongtong gok olopolop
Di borngin di rondang ni bulan
marpungu hita di alaman
sipata marhulinghulingan
sipata marturiturian
di sada on adong na margak
di sada an adong na mergek
angka na metmet marsitengka
margala tingko na umbalga
namarbaju manduda eme
angka ina mambau lage
ama ni Uli marhasapi
ompung doli manginum kopi
ompung boru modom marnipinipi
Masihol ahu aut sura boi
mulak hita tu tingki sihadakdanahonta
marlange di aek godang i
nang pe doras alai ndang mabiar hita
marsigantung di dangka i
mambuat joring nang parira
marsilelean di adaran
marmeam nang pe ari udan
alai ndang lupa anggo laho tu singkola
Angka dongan simagodang
andigan be hita pajumpang
View on Path
